جامعاتنا بتستهبل

للأسف ان جامعاتنا هيا سبب زيادة البطالة
لانها للاسف بتكابر وتأخذها العزة بالاثم ومايعترفوا ان نص التخصصات تقريبا مايحتاجها سوق العمل وحتى النص الثاني مابيدرسوه بالشكل المطلوب
طبعا أنا مني خبير تربوي اوتعليمي لكن دا راي فقط
اول شي ابغا اذكر بعض التخصصات اللي من وجهة نظري يبغالها اعادة نظر طبعا في كثير
١- هندسة الكمبيوتر
٢- الرياضيات
٣- بعض التخصصات الدينية (لحد يتحمس ويقول ذا كافر ولا علماني راح اشرحلكم)
٤- اللغة العربية
٥- إدارة الاعمال الدولية
٦- الهندسة النووية
٧- التاريخ والجغرافيا

وفي تخصصات كثير غيرها

طيب دحين كثير حايقولوا يعني نقفل الأقسام ونسرح الدكاترة لا لا طبعا لا
فكرتي بسيطة وهيا دمج التخصصات وزيادةالمواد الاختيارية
مثلا سوق العمل مايحتاج خريجين لغة عربية لكن يحتاج إعلامين وصحفين متعمقين في اللغة العربية وطلاب التخصصات الباقية من حقهم ياخذوا مواد مكثفة في اللغة العربية

او مثلا سوق العمل مو محتاج خريجين عقيدة لكن حا يحتاج خريجين عقيدة أقوياء في اللغات الاجنبية لنشر العقيدة لغير المسلمين

سوق العمل مو محتاج مهندس كمبيوتر لكنه محتاج مبرمجين محتاج فنين صيانة محتاج خبراء شبكات محتاج مهندسين برمجيات فالأزم يخلو التخصص محدد اكثر

ان شاء الله فكرتي تكون وصلت
باختصار مو عيب لو وقفنا تخصص لوقت معين وندمج التخصصات عشان مانخرج عاطلين

وللأسف ان ٧٥٪ بيقول ان دراسته في ناحية وشغله في ناحية تانية تماماً وانا اولهم

Advertisements

تعليقان على “جامعاتنا بتستهبل

  1. اول شي انا معاك يا كيمو في كل كلامك بس ابغا اعمم و اخليها في كل الجامعات و ازيدك من الشعر بيت كمان …
    المبتعثين اللي طالعين يدرسو و تخصصاتهم دينية ولا لغة عربية ولا تاريخ اسلامي ولا …..الخ ، طلعوهم عشان يكملو ماجستير بس في غير تخصصهم اللي درسو زي مثلن التخصصات اللي قلتها يطلعوهم على ماجستير تسويق ولا شي تاني مختلف جدا عن تخصصو

    اللي بدي اقولو انو مو بس الناس بيشتغلو في مجال مختلف عن دراستهم إلا كمان بيكملو دراستهم في مجال غير دراستو يعني هما عارفين انو دي التخصصات مالها وظايف عشان كده مطلعينهم على تخصصات تانية …. طيب ليييه من الاساس تخليهم يدرسوها مادام ما تاكل عيش …

  2. معاك حق انا احس انه معظم التخصصات فقط نظرية بمعنى اصح ادرس ودرس بس لاتطمح بوظيفة بتخصصك مو بس التخصصات الي يبغالها اعادة نظر حتى المناهج انا بشغلي ما استفدت من الرياضيات الي درسته الواقع بعيد كل البعد عن المنهج والمشكله لما تجي تسال انه ليش بندرس اشياء مانستفيد منها الرد يجي سريع دي امور نظريه لازم نعرفها نفسي المناهج تتعدل والتخصصات ونستفيد من السنين الي بنتعب فيها بالدراسه شبعنا خيااااال صارت الدراسه زي الخيال مالها اساس في الواقع . يعطيك الف عافيه على الموضوع وصح لسانك  

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s