افتقد نفسي

لما تحس انك مضغوط ومتضايق ومهموم
وانك فقدت ضحكتك وفقدت متعتك بكل الأشياء اللي تحبها
لما تحس انك ضائع انك طفشان
تفقد جلستك مع عائلتك
تفقد تواصلك مع أصحابك
تفقد استمتاعك بنومك
تحس انك بتروح العمل عشان الراتب بس
تفقد حماسك
تفقد أحلامك
تزداد عليك الهموم وتعتقد إن اللي حوليك مهم حاسين بيك تحس انك أنت ما صرت تحس بنفسك

اتاكد إن في شي غلط بتعمله ولازم تتجرأ وتعترف بيه وتعدله بيدك وتراجع حساباتك برواقه
والمفتاح بيدك أنت فقط

مالك غير الله

إهداء إلى نفسي
افتقدك ياعبدالكريم

Advertisements

جامعاتنا بتستهبل

للأسف ان جامعاتنا هيا سبب زيادة البطالة
لانها للاسف بتكابر وتأخذها العزة بالاثم ومايعترفوا ان نص التخصصات تقريبا مايحتاجها سوق العمل وحتى النص الثاني مابيدرسوه بالشكل المطلوب
طبعا أنا مني خبير تربوي اوتعليمي لكن دا راي فقط
اول شي ابغا اذكر بعض التخصصات اللي من وجهة نظري يبغالها اعادة نظر طبعا في كثير
١- هندسة الكمبيوتر
٢- الرياضيات
٣- بعض التخصصات الدينية (لحد يتحمس ويقول ذا كافر ولا علماني راح اشرحلكم)
٤- اللغة العربية
٥- إدارة الاعمال الدولية
٦- الهندسة النووية
٧- التاريخ والجغرافيا

وفي تخصصات كثير غيرها

طيب دحين كثير حايقولوا يعني نقفل الأقسام ونسرح الدكاترة لا لا طبعا لا
فكرتي بسيطة وهيا دمج التخصصات وزيادةالمواد الاختيارية
مثلا سوق العمل مايحتاج خريجين لغة عربية لكن يحتاج إعلامين وصحفين متعمقين في اللغة العربية وطلاب التخصصات الباقية من حقهم ياخذوا مواد مكثفة في اللغة العربية

او مثلا سوق العمل مو محتاج خريجين عقيدة لكن حا يحتاج خريجين عقيدة أقوياء في اللغات الاجنبية لنشر العقيدة لغير المسلمين

سوق العمل مو محتاج مهندس كمبيوتر لكنه محتاج مبرمجين محتاج فنين صيانة محتاج خبراء شبكات محتاج مهندسين برمجيات فالأزم يخلو التخصص محدد اكثر

ان شاء الله فكرتي تكون وصلت
باختصار مو عيب لو وقفنا تخصص لوقت معين وندمج التخصصات عشان مانخرج عاطلين

وللأسف ان ٧٥٪ بيقول ان دراسته في ناحية وشغله في ناحية تانية تماماً وانا اولهم

ممنوع سواقة الرجال


احس انه كتر الكلام كتييييير على سواقة الحريم وكل واحد بيفتي ويتفلسف في الموضوع لدرجة غريبة
تلاقي حرمتين في روتانا بيتضاربوا عن السواقة وفجاة تقلب الهرجه عن الجنسية وكشف الوجه
تلاقي امام المسجد في خطبة الجمعه بيتكلم عن تجمع الشباب عند مدارس البنات ايام الاختبارات وفجأة يقول وتبغوا الحريم يسوقوا؟(ايش دخلها في الهرجة)
ولاتلاقي امام بيستشهد بفتوى من حاخام يهودي بانه سواقة المرأة فتنه وبعد مايخلص الخطبة يقلك اللهم العن اليهود والنصارى.

المهم انا ابغا اتفلسف بالارقام والاحصائيات الرسمية
http://www.cdsi.gov.sa/pdf/census31-prim-01.pdf

حسب الاحصائية الرسمية لمصلحة الإحصاءات العامة والمعلومات
في 2010 كان عدد الذكورفي السعودية %50.9 والنساء 49.1%

فامايحتاج كلام الحل ان يسمح للسيدات بقيادة السيارات ومنع الرجال من القيادة
وحا ناخذ فوائد منها تخفيف الازدحام وتكون السواقة بذوق وماراح نحتاج ساهر لضبط السرعة
وصلاة الجمعه ماراح نلاقى الوقوف الهمجي في الشوارع
وخلى كل واحد امه توصله المدرسة
وكل زوجة توصل زوجها واولاده الدوام

صدقوني فلللللة خذوا الامور ببساطة لايترفع الضغط عندكم .

وعندي سؤال ماحكم سواقة المرأة السعودية للسيارة خارج السعودية ؟

العميل اخرا…

حقيقة استغرب كثيراً من حال الشركات في السعودية السائد فيها عدم احترام العميل واستغفاله اول شي بااذكر كم مثال.

1- في باقة زيرو في الاتصالات السعودية (الجوال) في الباقة دي يشترطوا الحد الادنى للفاتورة 350 ريال في شهرين اذا استخدمت اقل من كدا تجيك الفاتورة 350 اذا كانت الشركة تحترم العميل من المفروض تحول الرصيد الباقي للشهر التالي لكن مع الاسف مابيعملو كدا .
2- فى حال انقطاع الانترنت اكثر من يوم ماتلاقي احد يعوض المشترك عن الانقطاع او حتى يخصمو قيمة الاشتراك للايام اللي كان متعطل فيها “انا بااكتب التدوينة دي والانترنت مقطوع”.
3- اذا اشتريت بيرة هولستن او اي منتج ولقيت طعمه متغير او لقيت انه متعفن مافي اي جهة تردلك فلوسك او تعوضك.
4- في حال اتعطلت سيارتك النيسان بسبب خطأ فني في الشركة مافي اي شي يضمن حقك او يوقف جنبك.
5- في حال كنت ماشي على كورنيش جده وكانت فتحة تصريف المجاري مفتوحة وماانتبهت لها واتخرب الكفر او المساعدات مافي احد يعوضك.
6- في حال ضاعت شنطتك وانت مسافر على الخطوط السعودية ماراح تلاقي احد مهتم وبعدين ممكن يعوضوك 500 ريال او اقل بغض النظر عن قيمة محتويات الشنطة حتى ولو كان فيها مجوهرات او لابتوب.
7- اذا كنت تبغا تراجع البنك الاهلى وتبغا تحدث بياناتك او تصدر بطاقة صراف مثلا حاتلاقي انهم مفضلين العملاء اللي يبغوا ياخذو القروض عليك ويمشوهم قبلك حتى ولو انهم جو بعدك ومسوين نظامهم على كذا.
8- لو رحت البنك الاهلى و كنت تبغا تخلص شغلة لك وقالولك النظام مو شغال مين يعوضك؟.
9- اذا انقطعت الكهرباء عن بيتك او محلك ماراح يعوضوك عن الاشتراك ولا عن الاجهزة والاشياء اللي خربت.

دي امثلة من الاشياء اللي مرت عليا واتعمدت اذكر الشركات باساميها لان الاغلب له معانة معاها وفي غيرها كثير .
اللي مو راضين يفهموه انهم من غير عملاء مايسو هلله كل عملهم معتمد على وجود عملاء ولازم يكونوا راضين عشان يستمروا معاهم لكن للاسف انه عندهم عقليات متخلفة قاعدين في الادارات ومهم فاهمين قوة الاغلبية اي شركة لو فقدت 1000 من عملائها حيتأثر دخلها بشكل ملحوظ ولو مالقيوا عملاء راح يقفلوا بس مايفهموا .

انا احترم ( موبايلي-شركة اتحاد عذيب” قو”- بنك سامبا- بنك البلاد) وكل شركة تعرف تحترم عملائها وكل اللي بااقوله.
لازم كل واحد يعرف انه من غير العملاء حتى ولو كانوا من “صغار العملاء” ماراح يشتغلوا او يحققوا ارباح.
احترموا العملاء.

*” حتى الدول زي مصر وتونس مااحترموا عملائها الصغار ومااهتموا بيهم وقرروا يشوفوا احد ثاني ^_* بس مجرد مثال”

شاطر يابابا

انتشر استعمال الفيس بوك في عالمنا العربي وتقريبا عدد مستخدمين الموقع في السعودية تجاوز ٣ مليون مستخدم وبغض النظر لفوائد الموقع الكثيرة بس للأسف فضح مجتمعنا على حقيقته وكيف ان الشباب والبنات صارو مايفرقوا بين الصح والخطأ لدرجة انهم يحطوا انهم على علاقة “ان رليشن وذ” والمشكلة بعضهم متزوجين ولا يكتبولك في الديانه “وت ايفر” ولا يحطو صورهم وهما بيشربوا بيره او كحول ولا وحده متصوره وهيا لابسه ……..والتانية ……… من جد بلاش اكمل احسن.
ترى أنا مو شيخ بس من جد شي يخوف ان الناس بيعملوا الخطأ وبيتفاخروا والبقية مبسوطين وشغالين لايك
ترى الفله والتقدم مو كدا وترى انت مو فله لما الناس يعرفوا انك عربيد ولاسكير .

قال الله تعالى : لاّ يُحِبُّ اللّهُ الْجَهْرَ بِالسُّوَءِ مِنَ الْقَوْلِ إِلاَّ مَن ظُلِمَ [النساء:148].

وقال النبي : { كل أمتي معافى إلا المجاهرين، وإن من الإجهار أن يعمل العبد بالليل عملا، ثم يصبح قد ستره ربه، فيقول: يا فلان! قد عملت البارحة كذا وكذا، وقد بات يستره ربه، ويصبح يكشف ستر الله عنه }.

ترى دمي محروق لكن كل اللي ممكن اقوله شاطر يابابا عرفنا انك فله.

من جد تبغا ايباد؟

*التدوينة دي مو بس على الايباد بس على سبيل المثال فقط

معظم الناس اللي يبغوا يشتروا أجهزة الاكترونية أو كمبيوترات بيدوروا على اعلى المواصفات واحدثها مع ان اغلبهم ما يحتاجوا 70%من المواصفات اللي بيشتروها ولا راح يحتاجوها مستقبلا لان عالم التقنية بيتطور بشكل سريع جدا وبتنزل تقنيات كثيرة جدا في وقتها مالها استعمال كبير ويكون سعرها مرتفع.

وعلى سبيل المثال تقنية “ٌRFID” تقنية لها تطبيقات كثيرة حاليا لكن نشأتها كانت عام 1973 وحاليا تعتبر رخيصة جدا مقارنة عما كانت عليه وقت نزولها الاسواق مع محدودية تطبيقاتها وقتها.

الفكره با اختصار لاتشتري الاحدث والاعلى اشتري اللي تحتاجه.
لانك بعد عمر الجهاز الافتراضي راح ترميه وانت تقريبا ما استفدت من امكانيته كلها مع انك دفعت تكلفتها .
اكثر الناس اشتروا الايفون 3 اول مانزل وبعدها بفتره اشتروا ايفون 3جي اس مع انه الفروقات لاتذكر و مافي احد يحتاج يبدل له وبعد فتره اشتروا ايفون 4 وكمان اشتروا ايباد مع انه تقريبا كلها جهاز واحد باختلافات بسيطه سويت مقارنة بسيطة بينهم وحطيت العوامل المهمة لمعظم الناس .

من وجهة نظري ما في احد يحتاج الايباد لانه ممكن تستبدله بالايفون والايبود وزي كذا في اجهزة وتقنيات كثيرة ما نحتاجها ونشتريها وكل اللي اطلبه منكم انكم في المرة القادمة اللي تبغو تشتروا شي شوفوا انتو تحتاجوه دحين ولا لا؟

ها من جد تبغا ايباد ؟ ^_^

*اعتمدت على موقع موبايلي وI-Weaverو الحاسبات العربية في اسعار الاجهزة .

مترو المشاعر المقدسة vs مترو دبي

مترو المشاعر
كل واحد صار يفتي وكل واحد صار عندوا خبره في انشاء القطارات والسكك الحديدية ويقلك يا عمي 6 مليار كثير على القطار ومن الصور يقلك يا بويا صيني ومن التشليح او يقلك مترو دبي ما كلف كدا وهو ما تعب نفسه ودور كم تكلفة مترو دبي و ايش الفرق بينهم المهم وباختصار أبغا أسويلكم مقارنة بسيطه بين مترو المشاعر ومترو دبي والعاقل يحكم

المسافة: مكة 18 كم \دبي 72 كم

عدد القطارات: 9\87

عدد المقصورات في القطار الواحد: 12\5

يعني لو تبغوا تقسموها بالتساوي مترو مكة يصير 21 قطار من حقت دبي

عدد المسافرين في القطار الواحد 3000\643

يعني قطار واحد بي اربعه من دبي

المحطات 9\47

التكلفة ونص6 مليار \28 مليار

بالنسبه للون مو عاجبني بس عمر الجودة تتحدد باللون
بعد ما خلصنا المقارنة خلينا نسوي قائمة بالاحتياجات للمشروع من وجهة نظر العامة وباهمال تفاصيل كثير مخفية علينا

الحديد المسلح -الخرسانة-الزجاج-الابواب والدربزين الحديد -البوابات- الطوب -الدهانات-تجهيزات مكتبية-اجهزة كمبيوتر ومستلزماتها -تمديدات كهربائية -القطار-السكة الحديدية-نظام التشغيل-نظام الاتصالات-بناء المباني الرئيسة-تدريب المشغلين-رواتب العمال لثلاث سنوات -رواتب المشغلين للثلاث سنوات-رواتب الادارة لثلاث سنوات-نسبة الربح-إنشاء محطتين كهرباء-مصاريف التشغيل-سيارات ومعدات-بلاط واسمنت-مصاعد-القطع الصخري-ترحيل الخدمات -أنظمة السلامة…..الخ.

بعد ما خلصنا احب اقول انو الصين دوله جباره وممكن تصنع اي منتج باي جوده على حسب الميزانية والدليل ان اغلب الشركات اتجهت للتصنيع في الصين مثل سوني وابل وغيرها.
وعلى فكره تم توريد محركات القطار من شركة ”بومبارديه“ الكندية، وتم توريد أنظمة الفرامل وناقل السرعات من شركة ”كنور“ الالمانية، ووردت شركة ”تاليس“ الفرنسية-الكندية توريد أنظمة الإشارات والتحكم والقيادة الآلية، كما تولت شركة ”سيمنس“ الالمانية كافة الأعمال الكهربائية.
والمسؤولين عن السلامة بريطانين و المدربين والمشغلين نفسهم اللي اشتغلو في مترو دبي وماليزيا وسنغافورا و الصين و بريطانيا
واحب اقول انو اي مشروع ييعملوا له دراسة تكاليف لكل التفاصيل ومافي شركة ماتبغا تربح من مشاريعها
ومعظم مشاريع القطارات في العالم مشاريع غير ربحية للدول لانه تكلفة تشغيلها اعلى من دخلها .

ايش رئيكم ؟

طفشتونا

التقنيه الحديثه نعمه كبيره وغيرت نمط حياتنا زي الايميل والبلاك بيري وغيرها وطرق استعمالها كثير في الاعمال التجاريه والحياة اليوميه وللتسليه والتعليم …

بس كمان في ناس كثير بيستخدموها لنقل الاشاعات والكلام اللي مالو داعي

واكثر شي خلاني اكتب دا الموضوع هو الكذب على رسولنا الكريم صلى الله عليه وسلم وتناقل الناس بروكاست بخصوص “تهنئة المسلمين بشهر ذي الحجة يحرم دخول النار ” من غير مايفكر الواحد باين انو دا كلام فاضي ومكذوب على الرسول لا تكون مغفل وترسل أي شي يجيك من غير لاتفكر او على الاقل تتأكد من صحته

ممكن تتأكد من الأحاديث عن طريق موقع الدرر السنية او أي بالبحث في Google.com

وفي اكثر من اشاعة غبيه بمجرد التفكير فيها تعرف انها كذبه زي :

1- كذبة انو باقي 578 ايميل في الهوت ميل ولازم ترسل هذي الرساله والا حايتقفل حسابك

– اذا حسبنا الهوت ميل يسمح لغاية 64 حرف لاسم الحساب وممكن تختار بين 39 حرف ورقم وشكل حايطلع رقم خرافي والرقم دا حا تضربو في عدد الدومينات حقت الهوتميل (msn.com ,hotmail.com,live.com ,غيرها).

– وثاني شي دي الرساله بتترسل تقريبا من 2006 الى اليوم والناس برضه يرسلوها تاني

2- كذبة ” فتاة تبلغ من العمر 16 عاما مريضة جدا عجز الاطباء عن علاجها وفي ليلة القدر بكت الفتاة من شدة الالم ولما نامت جائتها السيدةعائشة رضى الله عنها ايقظتها من نومها واعطتها شربة ماء ولما استيفظت الفتاة وجدت نفسها شفيت تماما ووجدت قطعة من القماش مكتوب عليها ان تنشر هذه الرسالة وتوزعها على الاقل على 12 فرد وتكتب فيها لا اله الله محمد رسول الله

وصلت هذه الرسالة الى عميد بحري ووزعها على 12 فرد فحصل على ترقية خلال 11 يوم

وصلت هذه الرسالة الى تاجر فأهملها فخسر كل ثروته خلال 12 يوم

وصلت هذه الرسالة الى عامل فوزعها فحل الله له كل مشاكله خلال 12يوم

ووصلت هذه الرسالة الى طالب على ابواب الامتحان فخاف الا ينجده الله فوزعها فنجح”

مافي استبلاه اكثر من كذا العاقل والمؤمن بالله يعرف انه كلام فاضي دي الرساله اول مره قريتها كنت في الابتدائي والين دحين برضه في ناس بترسلها .

3- كل الرسايل اللي يكتبو في نهايتها احلفك بالله ترسلها ولا امانة ترسلها ولا ارسلها ل15 والكلام الفاضي دا تعرف انها كذب في كذب.


الخلاصه شغلو مخكم واستخدموا التقنية في التأكد والبحث وخلااااااااااص ترى طفشتونا.